ዕረፉ እኔም አምላክ እንደሆንኩ እወቁ

እግዚአብሔርን በማወቅና በማመን የሚገኝ እረፍት፡፡ 

ዕረፉ፥ እኔም አምላክ እንደ ሆንሁ እወቁ፤ በአሕዛብ ዘንድ ከፍ ከፍ እላለሁ፥ በምድርም ላይ ከፍ ከፍ እላለሁ። መዝሙረ ዳዊት 46፥10 

ተስፋ የሰጠው የታመነ እንደ ሆነ ስለ ቈጠረች፥ ሣራ ራስዋ ደግሞ ዕድሜዋ እንኳ ካለፈ በኋላ ዘርን ለመፅነስ ኃይልን በእምነት አገኘች። እብ 11፡11

በእግዚአብሔር ስለምናምን ነው በተስፋው የምናምነው፡፡ ይህም ማለት ተስፋውን ከማመናችን በፊት የተናገረውን አምላክ ነው ያመነው፡፡ ከንግግሩ በፊት ተናጋሪውን ነው ያመነው ወይም በንግግሩ ተናጋሪውን ነው ያመነው፡፡ የእግዚአብሔር ቃል ተናጋሪውን እግዚአብሔርን አውቀንና አይተን እንድናምን ነው የተጻፈልን፡፡ የእግዚአብሔር ቃል በመጀመሪያ በእግዚአብሔር እንድናምን ነው የሚያደርገን፡፡ እግዚአብሔር የታመነ ነው የምንለው የሚያደርገውን ካየን በኋላ አይደለም፡፡ ራሱን ተናጋሪውን ማንነቱን ኃይልነቱን ታማኝነቱን ነው የምናምነው፡፡ በሥራው የምንመዝነው ከሆነ አንድ ነገር እስኪያደርግ ጠብቀን በዚያ ድርጊት በመረታት ነው የምናምነው፡፡ ይህ ግን እምነት አይደለም፡፡ እምነት ከማይታየው ይጀምራልና፡፡ እግዚአብሔርን የምናምነው ማንነቱ አምላክነቱ አባትነቱ በርቶልን ነው፡፡ እምነት ከብርሃን ከመገለጥ ነው የሚጀምረው፡፡ ቅዱስ ጴጥሮስ የተሰወረውን አብ ብቻ የሚያውቀውን የኢየሱስ ክርስቶስን ማንነት አወቀ አመነም፡፡ አንተ ክርስቶስ የህያው እግዚአብሔር ልጅ ነህ አለው፡፡ ኢየሱስም መልሶ እንዲህ አለው፦ የዮና ልጅ ስምዖን ሆይ፥ በሰማያት ያለው አባቴ እንጂ ሥጋና ደም ይህን አልገለጠልህምና ብፁዕ ነህ።” አለው ማቴ 16፤16 እና 17